នៅពេលដែលយើងរៀនសូត្រច្រើន ឬមានការងារត្រូវបំពេញ រហូតទាល់តែមានការហត់នឿយ គ្មានពេលសម្រាកនោះ រាងកាយរបស់យើង នឹងថមថយកម្លាំង ហើយថាមពលរាងកាយ ក៏ចុះខ្សោយទៅតាមនោះដែរ។ ចង់ដោះស្រាយបញ្ហានេះ លោកអ្នកអាចអនុវត្តរបបហូបចុកដូចខាងក្រោម៖
១-បរិភោគអាហារដែលមានរសជាតិធន់កណ្តាល ឬសាបសម្រាប់អាហារពេលព្រឹក ពីព្រោះថាពោះវៀនទើបតែក្រោកពីសម្រាកថ្មីៗ ហេតុនេះបើយើងចាប់ផ្តើមដោយអាហារមានរសជាតិហឹរខ្លាំង ឬរឹងខ្លាំង ប្រយ័ត្នឆ្អល់ពោះ ហើយការបំពេញការងារកាន់តែជួបការលំបាក។
២-ក្រោយពីបរិភោគអាហារថ្ងៃត្រង់ហើយ កុំភ្លេចរកម្នាស់ ឬស្វាយជូរមកបរិភោគដើម្បីឲ្យរាងកាយស្រស់ស្រាយបានកាន់តែយូរ ព្រោះថារសជាតិជូរមានគុណសម្បត្តិជួយដាស់រាងកាយ ឲ្យរហ័សរហួន មិនស្ពឹកស្រពន់ជាងធម្មតា។
៣-ផឹកកាហ្វេពេលល្ងាចអាចបង្កឲ្យប្រសាទកម្រើករហូត ហើយនៅពេលចូលដំណេក គឺដេកមិនលក់ស៊ប់ឡើយ។ បើការដេកមិនលក់នាំឲ្យភ្ញាក់ឡើងមកមុខឡើងស្លេកស្លាំងបាត់ភាពស្រស់ស្រាយ
៤-ក្នុងជីវិតនៃការបរិភោគអាហាររបស់អ្នកអ្វីៗអាចខ្វះបាន តែការខ្វះបន្លែ និងផ្លែឈើនោះ ពិតជាមិនអាចបានឡើយ ព្រោះវីតាមីន អំបិលរ៉ែ កាកសរសៃអាហារមានក្នុងចំណីអាហារទាំងនេះជារបស់ដែលរាងកាយត្រូវការ។ ក្រៅពីនេះ វាថែមទាំងជួយរំងាប់ភាពតានតឹងអារម្មណ៍ដែលជួយឲ្យរាងកាយស្រស់ស្រាយ។
៥-ស្ត្រីយើងពេលខ្លះមានការងារច្រើនហូរហៀរ មិនមានពេលហាត់ប្រាណរហូតសារជាតិខ្លាញ់ និងកូឡេស្តេរ៉ូលត្រូវផ្ទុកច្រើនក្នុងសរសៃឈាម។ ការជួបបញ្ហាបែបនេះមិនយូរមិនឆាប់ បញ្ហាបេះដូង និងរោគសន្លាក់និងយាយីហើយ។ បើចង់គេចផុតបញ្ហាដ៏អាក្រក់នេះ អ្នកត្រូវបរិភោគត្រី ដែលមានអូមេហ្គា-៣ ឲ្យបានជាប់ជាប្រចាំ ពីព្រោះថា សារជាតិអូមេហ្គា-៣ ជួយរំលាយខ្លាញ់ក្នុងឈាម និងពិសេសថែមទាំង នៅជួយកាត់បន្ថយអាការៈឈឺចុកចាប់ ពីការធ្លាក់រដូវខែដែលតែងបង្កឲ្យយើងតប់ប្រមល់ និងខ្វាយខ្វល់ច្រើនទៀតផង។
៦-ពេលដែលធ្លាក់រដូវខែ រាងកាយរបស់យើងតែងបាត់បង់កាល់ស្យូម និងធាតុដែកយ៉ាងច្រើនរហូតអស់កម្លាំង កំហែងរកតែបំពេញការងារមិនបានល្អ។ បើចង់មិនឲ្យជួបបញ្ហានេះ ស្ត្រីយើងគួរតែទទួលទានអាហារដែលមានវីតាមីន C និងធាតុដែក ជំនួយរាងកាយវិញ មានដូចជាស្លឹកបាស់ ខាត់ណា ទឹកដោះគោ បង្គា កំពឹស ជាដើម។
៧-អាហារពេលថ្ងៃត្រង់មិនត្រូវបរិភោគច្រើននោះឡើយ ពិសេសអាហារប្រៃខ្លាំង ខ្លាញ់ច្រើន ព្រោះថា វានឹងបង្កឲ្យខួរក្បាលស្ពឹក និងងងុយដេក៕
No comments:
Post a Comment