នៅឆ្នាំ២០៣០ ពិភពលោកប្រឈម មុខនឹងរោគមហារីក កើនឡើងដល់ ៧៥ភាគរយ

ប៉ារីសៈ យោងតាមគេហទំព័រ សិង្ហបុរី “Channel News Asia” ចុះផ្សាយនៅ ថ្ងៃទី០១ ខែមិថុនា ឆ្នាំ ២០១២ថា នៅឆ្នាំ២០៣០ ពិភពលោកប្រឈមមុខ នឹងរោគមហារីក កើនឡើងដល់៧៥ភាគរយ ។

ព្រឹត្ដិបត្រមួយឈ្មោះថា ឡង់សិត បានចុះផ្សាយនៅថ្ងៃសុក្រនេះថា ផ្អែកតាមការសិក្សា ស្រាវជ្រាវនៅ ឆ្នាំ២០៣០ ពិភពលោកទាំងមូល ប្រឈមមុខ នឹងរោគមហារីក ដោយកើនឡើងដល់ ៧៥ភាគរយឯណោះ ។

ក្រុមស្រាវជ្រាវដែលដឹកនាំដោយ ប្រ៊េដឌី ប្រ៊េ “Freddie Bray” មកពីទីភ្នាក់ងារ អន្ដរជាតិ ស្រាវជ្រាវ រោគមហារីក នៅលីយ៉ុង ប្រទេសបារាំង បានលើកឡើងថា ក្រុម របស់លោកបាន សិក្សាស្រាវជ្រាវតាំងពី ឆ្នាំ២០០៨ ដែលមាន អ្នកកើតរោគមហារីក ប្រមាណ១២,៧ លាននាក់ ហើយពួកគេទើបកើត រោគមហារីកថ្មីៗ ហើយនៅ ឆ្នាំ២០៣០ខាង មុខនឹងកើនឡើង ដល់២២,២លាននាក់ ហើយប្រទេសក្រីក្រ អាចនឹងកើនឡើង ដល់៩០ភាគរយ ។

ក្រុមអ្នកស្រាវជ្រាវបានឱ្យដឹងថា នៅក្នុងប្រទេសជាច្រើន បានធ្លាក់ចូលក្នុង អន្លង់យ៉ាងជ្រៅ ពោលគឺការ ឆ្លងចូល រោគមហារីក ជាច្រើនប្រភេទ ក្នុងនោះមាន មហារីក ពោះវៀន ខ្នែងពោះវៀន មហារីកសុដន់ និងមហារីកក្រពេញ ផងដែរ ។

តាមការសិក្សាស្រាវជ្រាវបានឱ្យដឹងទៀតថា មានប្រទេសចំនួន១៨៤ សុទ្ធតែមានអ្នកជំងឺ កើតរោគមហារីក ។

នៅក្នុងឆ្នាំ២០០៨ មានតែប្រទេសអ្នកមានប៉ុណ្ណោះ ដែលប្រឈមមុខនឹងរោគ មហារីកសុដន់ មហារីកសួត មហារីក ក្រពេញ និងមហារីក ជាច្រើនប្រភេទទៀត ។ នៅក្នុងប្រទេសមាន ជីវភាពមធ្យមវិញ គឺមាន រោគមហារីកក្រពះ និងមហារីកថ្លើម ដែលជារោគ កើតឡើងជារឿយៗ ។

ដោយឡែកសម្រាប់ប្រទេសក្រីក្រវិញ មានរោគមហារីកស្បូន មហារីកសុដន់ និងមហារីក ថ្លើមដែរ ៕