ប្រសិនបើអ្នកគ្មានពេលវេលាគ្រប់គ្រាន់ សម្រាប់ថែទាំស្បែកមុខរបស់អ្នកទេនោះ យើងមានវិធីណែនាំដូចខាងក្រោម៖
១)-លាបឡេបំប៉ន: ការលាបឡេបំប៉ន ចំណាយពេលវេលាត្រឹមតែ ៥នាទីប៉ុណ្ណោះ តែវាជួយផ្តល់សារជាតិអាហារ ទៅចិញ្ចឹមស្បែកបានពេញមួយថ្ងៃ។ អ្នកលាបឡេបំប៉ន និងអ្នកមិនបានលាបឡេបំប៉នស្បែកមុខ មានលក្ខណៈខុសគ្នាច្រើន។ ដូច្នេះរយៈពេលត្រឹមតែ ៥នាទី មិនគួរឲ្យខកខាននោះឡើយ។
២)-ស្ប្រៃយ៍ទឹករ៉ែ: ប្រសិនបើគ្មានពេលមើលថែទាំស្បែកទេនោះ សុំតែរយៈពេលមួយនាទីប៉ុណ្ណោះ សម្រាប់បាញ់ស្ប្រៃយ៍ទឹករ៉ែ ឲ្យសព្វផ្ទៃមុខរបស់អ្នករួចផ្តិតវាចេញដោយថ្នមៗ។ វិធីនេះទោះបីអ្នកយកទៅប្រើនៅកន្លែងធ្វើការ ក៏គ្មានអ្នកណារិះគន់ដែរ ជាពិសេសវិធីងាយស្រួលបែបនេះ អ្នកអាចធ្វើបានពេញមួយថ្ងៃតែម្តង។
៣)-ទទួលទានទឹកស្អាតរៀងរាល់ម៉ោង: ប្រសិនបើមិនបានទទួលទានរៀងរាល់ម៉ោងនោះទេ យ៉ាងហោចណាស់ក៏បានមួយថ្ងៃ ពី ៦ទៅ៨ កែវដែរ ដើម្បីជួយរក្សាតុល្យភាពនៃបរិមាណទឹកដែលរត់ទៅចិញ្ចឹមរាងកាយ។ ចំណែករឿងទឹកតែ ឬកាហ្វេវិញនោះ វាមានតែជួយជំរុញឲ្យស្បែកឆាប់ស្ងួតក្រៀមទៅវិញទេ បើអ្នកស្រលាញ់ស្បែក គួរចៀសវាង។
៤)-កុំប្រើដៃស្ទាបអង្អែលស្បែកមុខ: បើសិនគេប្រើមីក្រូទស្សន៍ ពិនិត្យមើលលើដៃនោះ គេនឹងឃើញនៅលើបាតដៃ ពោរពេញទៅដោយពពួកមេរោគច្រើនសន្ធឹកសន្ធាប់ផ្តុំគ្នានៅទីនោះ។ ដូច្នេះអ្នកដែលចូលចិត្តប្រើបាតដៃ ម្រាមដៃ ត្រដុសទៅលើស្បែកមុខដោយគ្មានការចាំបាច់ទេនោះ វាស្មើនឹងជួយនាំរោគ (មុន) មុខទៅលើស្បែកមុខ។ ប្រសិនបើអ្នកនឹកបារម្ភថា ស្បែកមុខឡើងខ្លាញ់ច្រើន គ្រាន់តែត្រៀមក្រដាសអនាម័យ ទុកផ្តិតនៅលើផ្ទៃមុខដោយថ្នមៗ ក៏អាចជួយបានដែរ។
៥)-ធ្វើចលនាសាច់ដុំផ្ទៃមុខ: ធ្វើចលនាសាច់ដុំផ្ទៃមុខ ឲ្យហាប់ណែន គ្មានស្នាមជ្រីវជ្រួញ ជាពិសេសស្នាមជ្រួញនៅត្រង់កន្ទុយភ្នែកទាំងសងខាង អាចធ្វើដោយមិនពិបាក។ វិធីណែនាំ គឺអង្គុយដកខ្លួនឲ្យត្រង់ រួចហើយហាមាត់ស្រែកបញ្ចេញសំឡេង អា អ៊ី អេ អូ យូ ដោយស្រែកមួយៗ ត្រង់មួយពាក្យៗឲ្យបាន ១០ ដង។ ខណៈពេលធ្វើ គួរហាមាត់ឲ្យអស់ រហូតដល់មានអារម្មណ៍ថា សាច់ដុំនៅលើផ្ទៃមុខធ្វើចលនា។
៦)-ជូតសម្អាតគ្រឿងសម្អាង: គ្រឿងសម្អាងដែលនៅសេសសល់លើផ្ទៃមុខ វានឹងធ្វើឲ្យរន្ធរោមលើផ្ទៃមុខស្ទះងាយបំផុត។ ផលអាក្រក់កើតឡើងតាមក្រោយទៀតគឺរោគ (មុន) មុខចាប់ផ្តើមលេចមកដូចផ្សិត ហើយទាមទារចំណាយពេល វេលារាប់ខែ ទើបធូរស្រាល ប៉ុន្តែបើអ្នកចំណាយពេលវេលាជូតគ្រឿងសម្អាងសម្អាតត្រឹមតែ ១នាទី បញ្ហាបែបនេះលេងកើតមានឡើងមករំខានចិត្តអ្នកទៀតហើយ។
៧)-កុំភ្លេចយកក្រដាសជូតមុខតាមខ្លួន: នៅពេលផ្ទៃមុខឡើងជាតិខ្លាញ់ ស្ត្រីខ្លះមានចិត្តអន្ទះសារ រហូតប្រញាប់ប្រញាល់ ប្រើគ្រឿងសម្អាង លុបបំបាត់ដើម្បីរក្សាភាពរលើបរលោងនៃស្បែកមុខ ប៉ុន្តែវិធីនេះវាស្មើនឹងការផ្អាប់វត្ថុស្មោគគ្រោកនៅលើស្បែកមុខ។ ទោះបីវាមិនបង្ករោគ(មុន)ក្តី តែសុខភាពស្បែកមុខរបស់អ្នកកាន់តែចុះខ្សោយជារឿយៗ។
ដូច្នេះមុនពេលអ្នកលាបគ្រឿងសម្អាត គួរប្រើក្រដាសអនាម័យ ផ្តិតថើៗ សម្អាតគ្រឿងសម្អាងចាស់ៗនៅលើស្បែកមុខឲ្យអស់រហូតដល់មានទំនុកចិត្តថា ស្បែកជ្រះស្អាតហើយ ទើបចាប់ផ្តើមលាបសារជាថ្មី។
No comments:
Post a Comment